ושרי זוג̇ה אברם לם תלד לה וכאן להא אמה מצריה אסמהא הג̇ר
פקאלת לאברם הוד̇א קד מנעני אללה מן אלולאדה אדכ̇ל אלי אמתי לעל יבנא ביתי מנהא פקבל אברם קול שרי
פאכ̇ד̇ת שרי זוג̇ה אברם הג̇ר אלמצריה אמתהא בעד עשר סנין מן מקאם אברם פי בלד כנעאן פאעטתהא לאברם זוג̇הא לתכון לה זוג̇ה
פדכ̇ל אלי הג̇ר פחמלת פלמא ראת אנהא כד חמלת האנת סידתהא ענדהא
פקאלת שרי אלי אברם ט̇למי עליך אעטיתך אמתי בחג̇רך פלמא ראת אנהא קד חמלת הנת ענדהא יחכם אללה ביני ובינך
קאל אברם לשרי הוד̇א אמתך פי ידך אצנעי בהא מא חסן ענדך פעדיבתהא שרי חתי הרבת מן בין ידיהא
ווג̇דהא מלאך אללה עלי עין מא פי אלבריה עלי אלעין פי טריק חג̇ר אלחיג̇אז
קאל יא הג̇ר אמה שרי מן אין תג̇י ואלי אין תמצ̇י קאלת מן בין ידי שרי סידתי אנא הארבה
וקאל להא מלאך אללה ארג̇עי אלי סידתך ואסתכ̇דמי תחת ידיהא
ת̇ם קאל להא מלאך אללה כת̇רא אכת̇ר נסלך חתי לא יחצי מן אלכת̇רה
ת̇ם קאל להא הא אנת חאמל תלדין אבנא ותסמיה אסמעאל אד̇ סמע אללה לצ̇עפך
והו יכון וחשיא מן אלנאס ידה פי אלכל ויד אלכל פיה ובחצרה ג̇מיע אכ̇ותה יסכן
פסמת אסם אללה אלמתג̇לי אליהא אנת אלטאיק אלנאט̇ר לאנהא קאלת אני ראית ההנא רחמתך בעד ראיי אלשקא
ולד̇לך סמית אלביר ביר ללחי אלנאט̇ר הוד̇א היא בין רקים ובין ברד
ת̇ם ולדת הג̇ר לאברם אבנא פסמא אברם אבנה אלד̇י ולדתה הג̇ר אסמאעיל
וכאן אברם אבן סת ות̇מאנין סנה הין ולדת הג̇ר לאברם אסמאעיל
