ת̇ם תקדם בנאת צלפחד אבן חפר אבן גלעד אבן מכיר אבן מנשה מן עשאיר מנשה אבן יוסף אללאתי אסמאהן מחלה ונעה וחגלה ומלכה ותרצה
פקמן בין ידי מוסי ואלעזר אלאמאם ואלאשראף וסאיר אלג̇מאעה ענד באב כ̇בא אלמחצ̇ר קאילאת
אן אבאנא מאת פי אלבריה והו פלם יכן פי ג̇מלה אלג̇מאעה אלד̇ין תג̇מעו עלי אללה מע קרח לאנה מאת בכ̇טיטה ולם יכ̇לף בנין
פלם ינקץ אסם אבינא מן בין עשירתה אד̇ ליס לה אבן בל אעטנא נחלה פימא בין אעמאמנא
פרפע מוסי חכמהן אלי אללה
ת̇ם קאל אללה למוסי תכלימא
נעמא קאל בנאת צלפחד אעטהן חוז נחלה פימא בין אעמאמהן ואנקל נחלה אביהן להן
ומר בני אסראיל וקל להם אי רג̇ל מאת וליס לה אבן פאנקלו נחלתה לאבנתה
פאן לם תכן לה אבנה פאעטו נחלתה לאכ̇ותה
פאן לם יכן לה אכ̇וה פאעטנהא לאעמאמה
פאן לם יכן לה אעמאם פאעטוהא לנסיבה אלאקרב אליה מן עשירתה יחוזהא וליכן ד̇לך לבני אסראיל רסם חכם כמא אמר אללה מוסי
ולמא קאל אללה למוסי אצעד אלי ג̇בל אלעברים הד̇א ואנט̇ר אלבלד אלד̇י אנא מעטיה בני אסראיל
פאד̇א אבצרתה פאנצ̇ם אלי קומך אנת איצ̇א כמא אנצ̇ם הרון אכ̇וך
כמא כ̇אלפתמא אמרי פי בריה צין ענד כ̇צומה אלג̇מאעה פלם תקדסאני בד̇לך אלמא בחצ̇רתהם ולד̇לך סמי מא כ̇צומה רקים פי בריה צין
קאל מוסי בין ידי אללה קאילא
אן שית יא רב אלאה ארואח ג̇מיע אלבשר פאסתכ̇לף רג̇לא עלי אלג̇מאעה
יכירג̇ בין ידיהם וידכ̇ל בין ידיהם ויכ̇רג̇הם וידכ̇להם ולא יבקו כגנם ליס להם ראע
פקאל אללה למוסי כ̇ד̇ יהושע אבן נון פאנה רג̇ל פיה פצ̇ל ואסנד ידך עליה
ואוקפה בין ירי אלעזר אלאמאם וסאיר אלג̇מאעה ומרה בחצ̇רתהם
ואג̇על עליה מן בהאיך לכי תקבל מנה ג̇מאעה בני אסראיל
וליכן וקופה בין ידי אלעזר אלאמאם חתי יסאל פי חואיג̇ה בהיאה אלאנואר בין ידי אללה וען אמרה יכ̇רג̇ו וידכ̇לו הו ובנו אסראיל וסאיר אלג̇מאעה
פצנע מוסי כמא אמרה אללה אן אכ̇ד̇ יהושע ואוקפה בין ידי אלעזר אלאמאם וסאיר אלג̇מאעה
ואסנד ידיה עליה ואוצאה כמא קאל לה אללה