פלמא ראי בלעם אן אלאצלח ענד אללה תבריך אלאסראיל לם ימץ̇ כאלמרתין אלאולתין פי טלב אלפאלאת̇ ואקבל בוג̇הה אלי ברהם
פלמא מד בצרה וראהם נזלין עלי נט̇אם אסבאטהם חלת עליה נבוה אללה
פצ̇רב מת̇לה וקאל קל יא בלעם אבן בעור וקל יאיהא אלרג̇ל אלחדיד אלבצר
וקל יא סאמע אקואל אלטאיק ונאט̇ר מנאט̇ר אלכאפי והו נאים והו מפתוח אלעין
מא אג̇וד אכ̇ביתך יא אליעקוב ומנאזלך יא אלאסראיל
פהי כאודיה ממדודה וכג̇נאן עלי נהר וכמצ̇ארב צ̇רבהא אללה וכארוז עלי מא
יהטל אלמא מן דואליה וגרסה פי מא גזיר וירתפע מן אגג מלכה ותתסאני ממלכתה
ואלטאיק אלמכ̇רג̇ה מן מצר כארק אלרים מאנע ענה פהו יאכל אעדאה מן אלאמם ועט̇אמהם ינהש וסהאמה תדנפהם
ואד̇א ג̇ת̇א ורבץ̇ פהו כאסד או לבו מן ד̇א ית̇ירה מבארכך מבארך ולאענך מלעון
פאשתד גצ̇ב בלק עלי בלעם וצפק כפיה חרדא וקאל לה אנמא דעות בך לתסב אעדאי פאד̇א בך קד בארכתהם הד̇ה אלמרה אלת̇אלת̇ה
פאלאן פאנצרף אלי מוצ̇עך לקד עזמת אן אכרמך פמנעך אללה מן אלכראמה
קאל לה אלם אקל לרסלך אלד̇ין בעת̇ת בהם אלי
לו אעטאני בלק מל ביתה פצ̇ה או ד̇הבא לא אסתטיע אן אתג̇אוז אמר אללה פאעמל ג̇ידה או רדיה מן ראיי אלד̇י יקולה אללה אקולה פקט
ואלאן הא אנא מנצרף אלי קומי תעאל חתי אערפך מא יצנע האולי אלקום בקומך פי אכ̇ר אלאיאם
פצ̇רב מת̇לה וקאל קל יא בלעם אבן בעור וקל יאיהא אלרג̇ל אלחדיד אלבצר
קל יא סאמע אקואל אלטאיק ועארף מערפה אלעאלי ונאט̇ר מנאט̇ר אלכאפי והו נאים והו מפתוח אלעין
אמר אראה וליס הו אלאן ואלמחה פהו גיר קריב אן יטלק כוכב מן אליעקוב ויקום קציב מן אלאסראיל פיוהן ג̇האת מואב ויזלזל סאיר בני שת
וסיכון אדום מנקרצ̇א וכד̇לך שעיר וסאיר אעדאיה ואסראיל יזדאד תאידא
ואלד̇י יסתולי מן אליעקוב יביד אלשריד מן אלקרי
ת̇ם ראי עמלק וצ̇רב מת̇לה וקאל אול אלאמם עמלק ואכ̇רהא אלי אבאדה
ת̇ם ראי אלקיניין פצ̇רב מת̇לה וקאל סיכון מסכנך צלבא ותציר פי אלצכ̇ר וכרך
ואד̇א יכון וקת לנפי אלקיניין פכם יסבי מנהם אלמוצליון
ת̇ם צ̇רב מת̇לה פקאל אלויל למן יחיא אדיא צירה אלטאיק
ואלדראמין מן פרצה קברס תעדיב אלמוצליין ואלעבריין והם איצ̇א אלי אבאדה
ת̇ם קאם בלעם פמציי ורג̇ע אלי מוצ̇עה ובלק איצ̇א מצ̇י אלי סבילה