פקאל אבן לי ההנא סבעה מד̇אבח ואעד לי סבעה רת̇ות̇ וסבעה כבאש
פצנע ד̇לך וקרבא ת̇ורא וכבשא עלי כל מד̇בח
ת̇ם קאל לה בלעם קף ענד קרבאנך ואמצ̇י אנא פלעלי יואפיני אמר אללה ואי קול ילקנניה אכ̇ברתך בה ומצ̇י פי הדי
פלמא ואפאה אמר אללה קאל יא רב אני קד נצ̇דת סבעה מד̇אבח וקרבת ת̇ורא וכבשא עלי כל ואחד מנהא
פלקנה אללה כלאמא פקאל ארג̇ע אלי בלק וקל כד̇א
פרג̇ע אליה פאד̇א בה ואקפא ענד קרבאנה וג̇מיע ריסא מואב מעה
פצ̇רב מת̇לה וקאל מן ארם סירני בלק מלך מואב מן ג̇באל אלמשרק קאילא תאעל פאלען לי יעקוב וד̇ם אלסראיל
מא אסב מא לם יסבה אלטאיק ומא אד̇ם מא לא יד̇מה אללה
ואנא אראה מן רוס אלג̇באל ואלמחה מן אליפאע אנה שעב סיסכן פרידא ולא יחסב מע סאיר אלאמם
יא מן יעד נסל יעקוב ויחצי ד̇ריה אסראיל אסאלך אן תמות נפסי מות אלמסתקימין ותכון אכ̇רתי מת̇להם
קאל לה בלק מא ד̇א צנעת בי דעותך לתסב אעדאי פאד̇א בך תבארך פיהם
פאג̇אבה וקאל לה אלא אן מא ילקנניה אללה אחפט̇ה ואקולה
קאל תעאל מעי אלי מוצ̇ע אכ̇ר תנט̇רה מנה לכנך תנט̇ר בעצ̇ה לא כלה פלעלך תסתטיע אן תסבה
פאכ̇ד̇ה אלי אלצ̇יעה אלמשרפה עלי ראס אלקלעה פבני הנאך סבעה מד̇אבח וקרב ת̇ורא וכבשא עלי כל מד̇בח
וקאל לה קף ההנא ענד קרבאנך ואנא אתלקי מן ההנא
פואפא אמר אללה אלי בלעם ולקנה כלאמא פקאל ארג̇ע אלי בלק וקל כד̇א
פג̇א אליה והו קאים עלי קרבאנה וריסא מואב מעה קאל מא ד̇א קאל אללה
פצ̇רב מת̇לה וקאל קם יא בלק ואסמע ואנצת לקולי יא אבן צפור
ליס אלטאיק כאלנאס פיכד̇ב ולא כבני אדם פינדם אתראה יקול ולא יפעל או יתכלם ולא יקום בה
אלא אן ברכאת קד קבלתהא פאבארך פיהם ולא ארדהא
ממא לם יבצר גלא פי אליעקוב ולא דגלא פי אלאסראיל פאללה רבהם מעהם וצחאבה אלמלך להם
אלטאיק אלמכ̇רג̇הם מן מצר בארק אלרים מאנע ענהם
ולא טירה תחיך פי אליעקב ולא קסאמה תות̇ר פי אלאסראיל ואנמא יקאל להם מא צנע אלטאיק פקט
והו שעב כלבו יקום וכאסד ירתפע לא ינצ̇ג̇ע אלי אן יאכל אלפריסה וישרב דם אלצרעי
קאל לה בלק אדי לא תסבה סבא פלא תבארכה ברכה
פאג̇אבה וקאל אלם אקל לך אן כלמא יקולה אללה אצנע
קאל תעאל אכידיך אלי מוצ̇ע אכ̇ר פלעל יסהל ענד אללה פתסבה לי מן הנאך
פאכ̇ד̇ה אלי ראס אלראביה אלמטלעה עלי וג̇ה אלסמאוה
קאל אבן לי ההנא סבעה מד̇אבח ואעד לי סבעה רת̇ות̇ וסבעה כבאש
פצנע כמא קאל לה וקרבא ת̇ורא וכבשא עלי כל מד̇בח