פרפעת אלג̇מאעה באצואתהם ובכו פי תלך אללילה
ותדמר עלי מוסי והרון ג̇מאעה בני אסראיל וקאלו להם יא ליתנא מתנא פי בלד מצר יא ליתנא מתנא פי הד̇א אלבר
ולם ידכ̇לנא אללה ד̇לך אלבלד פנקע באלסיף ויציר נסאנא ואטפאלנא גנימה אלא אן אלאצלח לנא אלרג̇וע אלי מצר
ת̇ם קאל בעצ̇הם לבעץ̇ נולי ריסא ונרג̇ע אלי מצר
פוקע מוסי והרון עלי וג̇וההמא בחצ̇רה ג̇וק ג̇מאעה בני אסראיל
ויהושע בן נון וכלב בן יפנה מן ראימי אלבלד כ̇רקא ת̇יאבהמא
וקאלא לג̇מאעה בני אסראיל קאילין אלבלד אלד̇י מררנא פיה לנרומה בלד ג̇יד ג̇דא ג̇דא
אן כאן ללה מראד פינא אדכ̇לנאה ווהבה לנא בלד יפיץ̇ אללבן ואלעסל
אמא עלי אללה פלא תתדמרו ולא תכ̇אפו אהל אלבלד פאנהם טעאמנא וסיזול ט̇להם ענהם ואללה מענא פלא תכ̇אפוהם
פכאד ג̇מיע אלשעב אן ירג̇מוהמא באלחג̇ארה ת̇ם ט̇הר נור אללה פי כ̇בא אלמחצ̇ר לג̇מיע בני אסראיל
פקאל אללה למוסי אלי כם יעצונני האולי אלקום ואלי כם לא יומנון בי מע ג̇מיע אלאיאת אלתי צנעתהא פימא בינהם
יסתחקון אן אצירבהם באלובא ואקרציהם ואג̇עלך אמה אעט̇ם ואכת̇ר מנהם
קאל מוסי ללה פיסמע דילך אלמצריון אלדיין אצעדת האולי אלקום מן בינהם בקדרתך
פיקולון מע אהל הד̇א אלבלד אלד̇ין סמעו אנך אללה נורך פימא בין האולי אלקום עינא בעין ירונה וגמאמך מקים עליהם ובעמוד גמאם תסיר בין ידיהם נהארא ובעמוד נאר לילא
פאד̇א קתלתהם אג̇מעין כרג̇ל ואחד קאל ג̇מיע אלאמם אלד̇ין סמעו אכ̇בארך הד̇ה קאילין
ממא לם יטק אלרב אן ידכ̇ל האולי אלקום אלבלד אלד̇י ועדהם בה קתלהם פי אלבר
ואלאן יתבין עט̇ם קדרתך יא רב כמא קלת לי
אנך אללה טויל אלאמהאל כת̇יר אלפצ̇ל גאפר אלד̇נב ואלג̇רם ויברי ולא יברי מטאלב בד̇נוב אלאבא מע אלבנין ואלת̇ואלת̇ ואלרואבע
אצפח ד̇נב האולי אלקום בכת̇רה פצ̇לך וכמא אחתמלת להם מן מצר ואלי אלאן
קאל אללה קד צפחת ענהם אלמעאג̇לה כמא סאלת
ולכן ובקאי אלדאים ונורי אלד̇י ימלא ג̇מיע אלארץ̇
אן ג̇מיע אלרג̇אל אלד̇ין ראו כרמי ואיאתי אלתי צנעתהא פי מצר ופי אלבר ואמתחנוני הד̇ה אלמרה אלעאשרה ולם יקבלו אמרי
אן ראו אלבלד אלד̇י אקסמת עליה לאבאיהם וכד̇לך כל מן יעציני לא יראה
ואמא עבדי כלב פג̇זא מא כאן לה ראי אכ̇ר אתבע בה טאעתי לאדכ̇לנה אלבלד אלד̇י צאר אליה ולנסלה יורת̇ה
ואלאן פאלעמאלקיון ואלכנעאניון מקימון פי אלמרג̇ פולו פי גד וארחלו אלי אלבריה אלי טריק בחר אלקלזם
ת̇ם כלם אללה מוסי והרון תכלימא
אלי כם אבקי הד̇ה אלג̇מאעה אלרדיה אלתי דמרת אלאמה עלי ולקד סמעת תדמר בני אסראיל אלד̇י תדמרו עלי
אלא קל להם ובקאי אלדאים יקול אללה אן לם אצנע בכם כמא קלתם בחצ̇רתי
ופי הד̇א אלבר תקע אג̇סאדכם מן כל מעדוד ומחצי מנכם מן אבן עשרין סנה פצאעדא כמא תדמרתם עלי
ואן אנתם דכ̇לתם אלבלד אלד̇י אקסמת באמרי אסכנכם פיה אלא כלב בן יפנה ויהושע בן נון
ואטפאלכם אלד̇ין קלתם אנהם יצירון גנימה פאני אדכ̇להם חתי יערפו אלבלד אלד̇י זהרתם פיה
ואמא אג̇סאדכם אנתם פתקע פי הד̇א אלבר
ובנוכם יקימון תאיהין פי אלבר ארבעין סנה פירמון טגיאנכם אלי פנא אג̇סאדכם פיה
באחצא אלאיאם אלתי רמתם פי אלבלד ארבעין יומא לכל יום סנה תחמלון אוזארכם אלי תמאם ארבעין סנה פתערפון מוצ̇ע אענאתי
אנא אללה קלת ד̇לך ואצנעה בג̇מיע הד̇ה אלג̇מאעה אלרדיה אלמג̇תמעה עלי פי הד̇א אלבר יפנון באלמות
ואלרג̇אל אלד̇ין בעת̇ בהם מוסי לירומו אלבלד פרג̇עו ודמרו עליה אלג̇מאעה ואכ̇רג̇ו שנאעה עלי אלארץ̇
פמאת אולאיך אלרג̇אל אלד̇ין אכ̇רג̇ו שנאעה רדיה עלי אלבלד באלצדאם בין ידי אללה
ויהושע בן נון וכלב בן יפנה עאשא מן ג̇מלה אלרג̇אל אלד̇ין מצ̇ו פראמו אלבלד
ולמא כלם מוסי בהד̇א אלכלאם ג̇מאעה בני אסראיל חזן אלקום ג̇דא
ואדלג̇ו באלגדאה פצעדו אלי ראס אלג̇בל וקאלו הא נחן צאעדון אלי אלמוציע אלדיי אמרנא אללה פקד אכיטאנא
קאל להם מוסי יא קום לא תתג̇אוזו אמר אללה פאנהא לא תנג̇ח
לא תצעדו פאן אללה ליס הו מעכם ולא תנצדמו בין ידי אעדאיכם
לאן אלעמאלקיין ואלכנעאניין ת̇ם בין ידיכם פתקעון באלסיף לאנכם רג̇עתם ען טאעה אללה ולא יכון אללה מעכם
פאעתדו וצעדו אלי ראס אלג̇בל וצנדוק עהד אללה ומוסי לם יזולא מן וסט אלעסכר
פנזל אלעמאלקיון ואלכנעאניון אלמקימון פי ד̇לך אלג̇בל פצ̇רבוהם וטרדוהם אלי חרמה