ובארך אללה פי נוח ופי בניה וקאל להם את̇מרו ואכת̇רו ועמו אלארץ̇
וכ̇ופכם וד̇ערכם יכונאן עלי ג̇מיע וחש אלארץ̇ וג̇מיע טאיר אלסמא וכל מא ידב עלי אלארץ̇ וג̇מיע סמך אלבחר פי ידיכם מסלמון
כל דביב טאהר חי יכון לכם מאכלא וככ̇צ̇ר אלעשב קד אעטיתכם אלכל
ואמא אללחם פלא תאכלוה בדמה פאנה נפסה
ואמא דמאכם מן אנפסכם פאטלבהא באלמנע מן כל וחש אטלבהא ומן יד אלאנסאן אי אנסאן קתל אכ̇אה טאלבתה בנפסה
אן יכון סאפך דם אלאנסאן באנסאן מתילה דמה יספך לאן בצורה שריפה מסלטא צנעה
ואנתם את̇מרו ואכת̇רו ואסעו פי אלארץ̇ ואכת̇רו פיהא
ת̇ם קאל אללה לנוח ולבניה מעה קאילא
האנא מת̇בת עהדי מעכם ומע נסלכם בעדכם
ומע כל נפס חיה אלתי מעכם מן אלטאיר ואלבהאים וחיואן אלארץ̇ אלד̇ין מעכם כל מן כ̇רג מן אלתאבות מן ג̇מיע חיואן אלארץ̇
ואת̇בת עהדי מעכם ולא ינקטע כל בשרי איצ̇א מן מא אלטופאן ולא יכון אבדא טופאן ליהלך אלארץ̇
וקאל אללה הד̇ה עלאמה אלעהד אלתי אנא ג̇אעלהא ביני ובינכם ובין כל נפס חיה אלתי מעכם לאג̇יאל אלדהר
והי קוסי קד ת̇בתהא פי אלגמאם ותציר עלאמה עהד ביני ובין אהל אלארץ̇
ויכון אד̇א גימת גמאמא עלי אלארץ̇ ט̇הר אלקוס פי אלגמאם
וד̇כרת עהדי אלד̇י ביני ובינכם ובין כל נפס חיה לכל בשרי ולא יציר איצ̇א אלמא טופאנא ליהלך כל בשרי
פתציר אלקוס פי אלגמאם אט̇הרהא ד̇כרא לאמאן אלדהר מן אללה לכל נפס חיה פי כל בשרי אלד̇י עלי אלארץ̇
וקאל אללה לנוח הד̇ה עלאמה אלעהד אלתי ת̇בתהא ביני ובין כל בשרי אלד̇י עלי אלארץ̇
וכאן בנו נוח אלכ̇ארג̇ון מן אלתאבות שם וחם ויפת וכאן חם יכנא אבא כנעאן
האולי אלת̇לת̇ה בנו נוח ומנהם תפרק אלנאס פי אלארץ̇
ואד̇ אבתדי נוח בפלאחה אלארץ̇ פגרס כרמא
ושרב מן אלכ̇מר וסכר ותכשף פי כ̇באיה
וראי חם אבו כנעאן עורה אביה ואכ̇בר אכ̇ויה והמא פי אלסוק
פאכ̇ד̇ שם ויפת ת̇ובא ג̇עלאה עלי מנכביהמא ומצ̇יא מסתדברין פגטוא עורה אביהמא ווג̇וההמא מסתדברה ועורה אביהמא לם יריא
ולמא אפאק נוח מן סכרה פעלם מא צנע בה אבנה אלצגיר
וקאל מלעון אבו כנעאן עבדא מסתעבדא יכון לאכ̇ויה
ת̇ם קאל תבארך אללה אלה שם ויכון אבו כנעאן עבדא לה
יחסן אללה ליפת ויסכן אכ̇ביה שם ויכון אבו כנעאן עבדא לה
ת̇ם עאש נוח בעד אלטופאן ת̇לת̇ מאיה וכ̇מסין סנה
פצאר ג̇מיע עמרה תסע מאיה וכ̇מסין סנה ת̇ם מאת