וכאן בעד הד̇ה אלאמור אד̇נבא סאקי מלך מצר ואלכ̇באז לסידהמא מלך מצר
פסכ̇ט פרעון עלי כ̇אדמיה רייס אלסקאה ורייס אלכ̇באזין
וג̇עלהמא פי אלחפט̇ פי מנזל רייס אלסיאפין פי אלסג̇ן אלד̇י כאן יוסף מחבוסא פיה
פוכל רייס אלסיאפין יוסף עליהמא ליכ̇דמהמא ואקאמא מדה פי אלחפט̇
אלי אן ראיא ג̇מיעא רויא כל רג̇ל עלי חדתה פי לילה ואחדה וכאן חלם כל ואחד חסב תפסירה אלסאקי ואלכ̇באז אלד̇אן למלך מצר אלמאסוראן פי אלסג̇ן
פדכ̇ל אליהמא יוסף באלגדאה וראי וג̇וההמא כאלחין
פסאל כ̇אדמי פרעון אלד̇אן מעה פי חפט̇ בית מולאה וקאל להמא מא באל וג̇והכמא מתגירה אליום
קאלא לה ראינא רויא וליס להא מפסר קאל להמא יוסף אן ללה אלתפאסיר קצוהא עלי
פקץ רייס אלסקאה רויאה עלי יוסף וקאל ראית כאן ג̇פנא בין ידי
ופי אלג̇פן ת̇לאת̇ה קצ̇באן והי כמא פרעת צעד נוארהא ונצ̇ג̇ת ענאקידהא וצארת ענבא
וכאן כאס פרעון פי ידי פאכ̇ד̇ת אלענב ועצרתה פיה ונאולתה כאסה
קאל לה יוסף הד̇א תפסירה אלת̇לאת̇ה קצ̇באן ת̇לאת̇ה איאם
אלי ת̇לאת̇ה איאם יד̇כרך פרעון וירדך אלי מרתבתך ותנאולה כאסה כאלסירה אלאולי אלתי כנת סאקיה
אלאן אד̇כרני מעך אד̇א ג̇אד אמרך ואצנע אלי פצ̇לא ואד̇כרני אלי פרעון ואכ̇רג̇ני מן הד̇א אלבית
לאני סרקת מן בלד אלעבראניין וההנא איצ̇א לם אצנע שיא אסתחקקת בסבבה אן יג̇עלוני פי אלחבס
ולמא ראי רייס אלכ̇באזין אנה קד פסרהא לה ללכ̇יר קאל לה ראית אנא איצ̇א כאן ת̇לת̇ סלאל חוארי עלי ראסי
ופי אלסלה אלעליא מן ג̇מיע טעאם פרעון ממא יצנעה אלכ̇באז וכאן אלטאיר יאכל מנהא פי אלסל פוק ראסי
פאג̇אבה יוסף וקאל הד̇א תפסירה אלת̇לת̇ סלאל ת̇לת̇ה איאם
אלי ת̇לת̇ה איאם ינזע פרעון ראסך ען ג̇סדך ויצלבך עלי כ̇שבה פיאכל אלטאיר מן לחמך
פלמא כאן פי אליום אלת̇אלת̇ והו מת̇ל יום ולד פיה פרעון צנע פיה מג̇לסא לג̇מיע קואדה פד̇כר רייס אלסקאה ורייס אלכ̇באזין פי מא בינהם
פאמר ברד רייס אלסקאה עלי סקיה ונאולה כאסה
וצלב רייס אלכ̇באזין כמא פסר להמא יוסף
ת̇ם נסי רייס אלסקאה יוסף ולם יד̇כרה