וכאן פי ד̇לך אלוקת איצ̇א הבט יהודה ען אכ̇תה פמאל אלי רג̇ל עדלמי אסמה חירה
ת̇ם ראי יהודה בנת רג̇ל תאג̇ר אסמה שוע פתזוג̇הא ודכ̇ל אליהא
פחמלת וולדת אבנא ואסמתה ער
וחמלת איצ̇א וולדת אבנא ואסמתה אונן
ועאודת וולדת אבנא ואסמתה שלה וכאן יהודה פי כזיב חין ולדתה
ת̇ם אתכ̇ד̇ יהודה זוג̇ה לער בכרה אסמהא תמר
וכאן ער בכר יהודה רדיא ענד אללה פאהלכה
פקאל יהודה לאונן אדכ̇ל אלי זוג̇ה אכ̇יך ואבתן בהא ואקם נסלא לאכ̇יך
פעלם אונן אנה ליס אליה ינסב אלנסל פכאן אד̇א דכ̇ל אלי זוג̇ה אכ̇יה אפסד סבילה עלי אלארץ̇ לילא יג̇על נסלא לאכ̇יה
פסא ענד אללה מא פעל ואהלכה איצ̇א
פקאל יהודה לתמר כנתה אג̇לסי ארמלה פי בית אביך אלי אן יכבר שלה אבני לאנה קאל כילא ימות הו איצ̇א כאכ̇ותה פמצ̇ת וג̇לסת פי בית אביהא
ת̇ם טאלת אלמדה ומאתת אבנה שוע זוג̇ה יהודה ותעזי בעדהא יהודה וצעד אלי ג̇אזי גנמה הו וחירה צאחבה אלעדלמי אלי תמנת
פאכ̇ברת תמר וקיל להא הוד̇א חמוך צאעד אלי תמנת ליג̇ז גנמה
פנזעת ת̇יאב חזנהא ענהא ותגטת באלכ̇מאר ותנקבת בה וג̇לסת פי מנט̇רה עלי טריק תמנת למא ראת אן קד כבר שלה והי לם תעט לה לתכון לה זוגה
פראהא יהודה וחסבהא ממתעה לאנהא כאנת תגטי וג̇ההא
פמאל אליהא ען אלטריק וקאל אן שית אדכ̇ל אליך לאנה לם יעלם אנהא כנתה קאלת מא תעטיני חתי תדכ̇ל אלי
קאל אנא אבעת̇ בג̇די מן אלגנם קאלת אעטני רהנא אלי אן תבעת̇ה
קאל מא אלרהן אלד̇י אעטיך קאלת כ̇אתמך ומפתולך ועצאך אלתי פי ידך ואעטאהא ד̇לך ודכ̇ל אליהא וחמלת מנה
ת̇ם קאמת ומצ̇ת פנזעת כ̇מארהא ענהא ולבסת ת̇יאב חזנהא
ובעת̇ יהודה באלג̇די מע צאחבה אלעדלמי ליפתך אלרהן מן יד אלמראה פלם יג̇דהא
פסאל אהל מוצ̇עהא וקאל להם אין אלממתעה אהי פי אלמנט̇רה עלי אלטריק קאלו מא כאנת קט ההנא ממתעה
פרג̇ע אלי יהודה וקאל לם אג̇דהא ואיצ̇א אהל אלמוצ̇ע קאלו מא כאנת ההנא קט ממתעה
וקאל יהודה תאכ̇ד̇ ד̇לך כילא נכון אזרא קד ארסלת ג̇דיא מן אלמאעז ואנת לם תג̇דהא
פלמא מצ̇ת ת̇לת̇ה אשהר אכ̇בר יהודה וקיל לה זנת תמר כנתך והא הי חאמל מן אלזנא קאל יהודה אכ̇רג̇והא פתחרק
בינאהא תכ̇רג̇ פבעת̇ת לחמיהא וקאלת מן אלרג̇ל אלד̇י לה הד̇ה אלאעלאק מנה אנא חמאל ת̇ם קאלת את̇בת למן הד̇א אלכ̇אתם ואלמפתולה ואלעצא
פאת̇בת יהודה וקאל קד צדקת ד̇לך מני ולד̇לך לם אזוג̇הא בשלה אבני ולם יעד איצ̇א אן יואקעהא
ולמא כאן פי וקת ולאדהא פאד̇א בתומין פי בטנהא
פלמא ולדת אכ̇רג̇ אחדהמא ידה פאכ̇ד̇ת אלקאבלה קרמזא פעקדתה עלי ידה וקאלת הד̇א כ̇רג̇ אולא
פלמא רד ידה כ̇רג̇ אכ̇וה פקאלת מא אחסן נמוך יא נאמי ואסמתה פרץ
ובעד ד̇לך כ̇רג̇ אכ̇וה אלד̇י עלי ידה אלקרמז ואסמתה זרח