ת̇ם רחל מן ת̇ם אברהים אלי בלד אלקבלה ואקאם בין רקים ובין ג̇פאר וסכן פי אלכ̇לוץ
ולמא קאל אברהים ען סארה זוג̇תה הי אכ̇תי בעת̇ אבימלך מלך אלכ̇לוץ פאכ̇ד̇הא
פג̇א מלאך אללה אלי אבימלך פי חלם אלליל פקאל לה אנך מית בסבב אלאמראה אלתי אכ̇ד̇תהא והי ד̇את בעל
ואבימלך לם ידן מנהא פקאל יא רב אאנסאנא צאלחא תקתל
אליס הו קאל לי אכ̇תי הי והי איצ̇א קאלת הו אכ̇י בצחה קלבי ובנקא כפי צנעת ד̇לך
פקאל לה מלאך אללה פי אלחלם אנא איצ̇א קד עלמת אן בצחה קלבך צנעת ד̇לך וצדדתך באלתעריף ען אן תכ̇טי לי ולד̇לך לם אדעך אן תדנו מנהא
ואלאן ארדד זוג̇ה אלרג̇ל אנה נבי וידעו לך פתחיא ואן לם תרדהא אעלם אנך האלך אנת וג̇מיע מא לך
ואדלג̇ אבימלך באלגדאה ודעא בג̇מיע קואדה וכלמהם בג̇מיע הד̇א אלכלאם פפזע אלקום ג̇דא
ת̇ם דעא אבימלך באברהים וקאל לה מא צנעת בנא ומא אכ̇טית לך אד̇ ג̇לבת עלי ועלי ממלכתי כ̇טיה עט̇ימה אעמאל לם יצנע מת̇להא צנעתהא מעי
וקאל אבימלך לאברהים מא ראית אד̇ צנעת הד̇א אלאמר
וקאל אברהים אני קלת לעל ליס כ̇וף אללה פי הד̇א אלמוצ̇ע פיקתלוני בסבב זוג̇תי
ועלי אלחקיקה הי קריבתי מן אבי לכן ליס מן אמי פצארת לי זוג̇ה
פלמא אכ̇תלעני אללה מן בית אבי קלת להא הד̇א פצ̇לך אלד̇י תצנעינה מעי פי כל מוצ̇ע נדכ̇ל אליה קולי עני הו אכ̇י
פאכ̇ד̇ אבימלך גנמא ובקרא עבידא ואמאא ואעטי אברהים ורד אליה שרה זוג̇תה
וקאל אבימלך הוד̇א בלדי בין ידיך אין מא צלח לך אקם פיה
ולשרה קאל קד אעטית אלף דרהם פצ̇ה אכ̇אך תכון לך כסוה חסנה לכל מן מעך והוד̇א אלכל חיאלך
ת̇ם דעא אברהים אלי אללה פאעפי אללה אבימלך וזוג̇תה ואמאה פולדן
לאן אללה כאן קד תואעד בחבס כל בטן מן אלאבימלך בסבב שרה זוג̇ה אברהים