ת̇ם קאל אללה למוסי קל להרון מד ידך בעצאך עלי אלאנהאר ואלכ̇לג̇אן ואלאג̇אם ואצעד אלצ̇פאדע עלי בלד מצר
פמד הרון ידה עלי מיאה מצר פצעד אלצ̇פאדע וגטא בלד מצר
וצנע כד̇אך אלעלמא בכ̇פיהם ואצעדו אלצ̇פאדע עלי בלד מצר
פדעא פרעון במוסי והרון וקאל אשפעא אלי אללה ויזיל אלצ̇פאדע עני וען קומי חתי אטלק אלקום יד̇בחו ללה
קאל מוסי לפרעון אקתרח עלי מתי תשא אן אשפע לך ולקואדך וקומך פינקטע אלצ̇פאדע ענך וען מנאזלך ותבקא פי אלניל פקט
וקאל גדא קאל כמא קלת לכי תעלם אנה ליס מת̇ל אללה רבנא
אד̇ תזול אלצ̇פאדע ענך וען קומך וקואדך ותבקא פי אלניל פקט
ולמא כ̇רג̇ מוסי והרון מן ענד פרעון דעא מוסי אלי אללה בסבב אלצ̇פאדע אלתי אחלהא בפרעון
פצנע אללה כמא קאל מוסי ותמאות אלצ̇פאדע מן אלביות ומן אלדור ומן אלצ̇יאע
חתי ג̇מעוהא אנבארא אנבארא ונתנת אלארץ̇ מנהא
ולמא ראי פרעון אן אלפרג̇ה קד כאנת ת̇קל קלבה ולם יקבל מנהמא כמא קאל אללה
ת̇ם קאל אללה למוסי קל להרון מד עצאך ואצ̇רב תראב אלארץ̇ יציר קמלא פי ג̇מיע בלד מצר
פצנעא כד̇אך ומד הרון ידה בעצאה פצ̇רב תראב אלארץ̇ פצאר קמלא פי אלאנסאן ואלבהימה ג̇מיע תראב אלארץ̇ צאר קמלא פי ג̇מיע בלד מצר
וצנע כד̇לך אלעלמא בכ̇פיהם ליכ̇רג̇ו אלקמל פלם יטיקו פת̇בת אלקמל פי אלנאס ואלבהאים
פקאלו אלעלמא לפרעון הד̇ה ג̇ראחה מן ענד אללה פאשתד קלבה ולם יקבל מנהמא כמא קאל אללה
ת̇ם קאל אללה למוסי אדלג̇ באלגדאה וקף בין ידי פרעון הוד̇א הו כ̇ארג̇ אלי אלמא וקל לה כד̇א קאל אללה אטלק קומי ויעבדוני
לאנך אן אבית אן תטלק קומי הא אנא באעת̇ עליך ועלי קואדך וסאיר קומך ומנאזלך כ̇לט אלוחוש חתי תמתלי מנה ביות אלמצריין ואלארץ̇ אלתי הם עליהא
ואבין פי ד̇לך אליום בלד אלסדיר אלד̇י קומי מקים בה לילא יכון ת̇ם וחש לכי תעלם אנני אללה מסלט עלי אלארץ̇
ואציר פדאא לקומי ממא יחל בקומך גדא תכון הד̇ה אלאיה
פצנע אללה כד̇אך ודכ̇ל וחש כת̇יר אלי בית פרעון ובית קואדה וג̇מיע בלד מצר אנפסד מן קבל אלוחש
פדעי פרעון במוסי והרון וקאל אמצ̇ו אד̇בחו לרבכם פי אלבלד
קאל מוסי לא נטיק אן נצנע ד̇לך לאן מא יכרהה אלמצריון נד̇בחה ללה רבנא פהל נד̇בח מא יכרהונה בחצ̇רתהם ולא ירג̇מונא
לכן מסאפה תילתיה איאם נסיר פי אלבר ונד̇בח ללה רבנא כמא יאמרנא
קאל פרעון אטלקכם תד̇בחון ללה רבכם עדא פאבעאדא לא תבעדו פי אלמסיר ואשפעא עני
קאל מוסי הא אנא כ̇ארג̇ מן ענדך ואשפע אלי אללה פיזול אלוחש ען פרעון וקואדה וקומה עדא לא יעאוד פרעון אלסכ̇ריה לילא יטלק אלקום יד̇בחון ללה
ולמא כ̇רג̇ מן ענדה שפע אלי אללה
פצנע אללה כמא קאל מוסי פזאל אלוחש ען פרעון וען קואדה וסאיר קומה לם יבק ואחד
ות̇קל פרעון קלבה הד̇ה אלמרה איצ̇א ולם יטלק אלקום