ואד̇א דכ̇לת אלי אלבלד אלד̇י אללה רבך מעטיך נחלה פחזתה ואקמת פיה
פכ̇ד̇ מן אואיל ת̇מר אלארץ̇ אלד̇י תדכ̇לה מן ריאצ̇ך אלתי אללה מעטיך וצירה פי בניג̇ה ואמץ̇ בה אלי אלמוצ̇ע אלד̇י יכ̇תארה אללה רבך ליחל נורה פיה
וסר בה אלי אלאמאם אלד̇י ילי פי ד̇לך אלזמאן וקל לה שכרת אליום אללה רבך אד̇ דכ̇לת אלי אלבלד אלד̇י קסם אללה לאבאינא אן יעטינאה
ויאכ̇ד̇ אלאמאם תלך אלבניג̇ה מן ידך פיצ̇עהא בין ידי קדס אללה
ת̇ם אבתד וקל בין ידי אללה רבך אן לבן אלארמני כאד אן יביד אבי פנזל מצר וסכן ת̇ם ברהט קליל פצאר ת̇ם אמה כבירה עטיימה
פאסא בנא אלמצריון ועד̇בונא וג̇עלו עלינא כ̇דמה צעבה
פצרחנא אלי אללה אלאה אבאינא פסמע צותנא ונט̇ר לצ̇עפנא ושקאינא וצ̇גטנא
פאכ̇רג̇נא מן מצר ביד שדידה וד̇ראע ממדודה ותכ̇ויף עט̇ים ואיאת ובראהין
וג̇א בנא אלי הד̇א אלמוצ̇ע ואעטאנא הד̇א אלבלד יפיץ̇ אללבן ואלעסל
ואלאן הוד̇א קד ג̇ית באואיל ת̇מר אלארץ̇ אלד̇י רזקתני יא רב ת̇ם צ̇עה בין ידי קדס אללה רבך ואסג̇ד בין ידי אללה רבך
ואפרח בכל כ̇יר רזקך אללה רבך ואלך אנת ואללוי ואלגריב אלד̇י פי מחאלך
ואד̇א פרגת מן תעשיר ג̇מיע עשור גלתך וד̇לך פי אלסנה אלת̇אלת̇ה סנה כמאל אלעשור ודפעת ד̇לך אלי אללוי ואלגריב ואליתים ואלארמלה ואכלו מנה פי מחאלך ושבעו
פקל בין ידי אללה רבך קד נפית אלאקדאס מן ביתי וקד דפעתהא ללוי וללגריב ולליתים וללארמלה כג̇מיע וצאיאך אלד̇י אוציתני לם אתג̇אוז שיא מנהא ולם אנסאה
ואלעשר אלד̇י לי לם אכל מנה פי חזני ולם אצרף מנה שיא אלי נג̇ס ולא פי חואיג̇ מית בל קבלת אמר אללה רבי פיה וצנעת פיה כמא אמרתני
פאטלע מן מוטן קדסך מן אלסמא ובארך פי שעבך אלאסראיל ופי אלארץ̇ אלתי אעטית לנא כמא קסמת לאבאינא אן תכון ארצ̇א תפיץ̇ לבנא ועסלא
ואעלם באן אללה רבך יאמרך פי הד̇א אליום בהד̇ה אלרסום ואלאחכאם פאחפט̇הא ואעמל בהא בכל קלבך ובכל נפסך
ואנך כמא אמרת אללה רבך אן יכון לך אלאהא ואן תסיר פי טרקה ותחפט̇ רסומה ווצאיאה ואחכאמה ותקבל אמרה
פכד̇אך אללה רבך אמרך אליום לתכון לה אמה כ̇אצה כמא ועדך ואן תחפט̇ ג̇מיע וצאיאה
ואן יג̇עלך עליא עלי סאיר אלאמם אלד̇ין כ̇לקהם מדיחא ואסמא ופכ̇רא ואן תכון שעבא מקדסא ללה רבך כמא ועדך