ת̇ם כלם אללה מוסי והרון קאילא
כלמא לבני אסראיל וקולא להם אי רג̇ל כאן ד̇איבא מן אחלילה פד̇ובה ד̇אך הו נג̇ס
והד̇ה צפה ד̇ובה אלתי תכון בה נג̇אסתה אמא אן יג̇על אחלילה אלד̇וב כאלריאל או ינכ̇תם מנה פתלך נג̇אסתה
וחכמה אן יכון כל מצ̇ג̇ע ינצ̇ג̇ע עליה ינג̇ס וכל אנא יג̇לס עליה ינג̇ס
ואי אנסאן דנא מן מצ̇ג̇עה פליגסל ת̇יאבה וירחץ̇ באלמא וינג̇ס אלי אלמגיב
ואלד̇י יג̇לס עלי אנא יג̇לס עליה ד̇איב יגתסל באלמא וינג̇ס אלי אלמגיב
ומן דנא בג̇סד ד̇איב פליגסל ת̇יאבה וירחץ̇ באלמא וינג̇ס אלי אלמגיב
ואן בזק אלד̇איב עלי אלטאהר יגסל ת̇יאבה וירחץ̇ באלמא וינג̇ס אלי אלמגיב
וכל מרכב ירכב עליה אלד̇איב ינג̇ס
וכל מן דנא בשי ממא יכון תחתה כד̇אך ינג̇ס אלי אלמגיב ומן חמל שיא מנהא יגסל ת̇יאבה וירחץ̇ באלמא וינג̇ס אלי אלמגיב
וג̇מיע מא דנא בה אלד̇איב ולם יגסל ד̇אתה באלמא פליגסל ת̇יאבה וירחץ̇ באלמא וינג̇ס אלי אלמגיב
ואי אנא כ̇זף דנא בה אלד̇איב פליכסר ואי אנא כ̇שב פליגסל באלמא
ואד̇א טהר אלד̇איב מן ד̇ובה פליחץ לה סבעה איאם לטהרה ויגסל ת̇יאבה וירחץ̇ בדנה במא מן נביע ויטהר
ופי אליום אלת̇אמן יג̇ בשפנינין או פרכ̇י חמאם אלי אלאמאם אלי אלבאב כ̇בא אלמחצ̇ר
ויצנע אלאמאם אחדהמא ד̇כוה ואלאכ̇ר ללצעידה ויסתגפר ענה בין ידי אללה מן ד̇ובה
ואי רג̇ל כ̇רג̇ת מנה נטפה אנסאל פליגסל ג̇מיע בדנה באלמא וינג̇ס אלי אלמגיב
ואי ת̇וב או ג̇לד צאר עליה מנהא שי פליגסל באלמא וינג̇ס אלי אלמגיב
ואיה מראה צ̇אג̇עהא רג̇ל בנטפה אנסאל פלירחצ̇א באלמא וינג̇סא אלי אלמגיב
ואיה מראה כאנת ד̇איבה והו אן יכון דם ינחל מן פרג̇הא פלתקם סבעה איאם פי חיצ̇תהא וכל מן דנא בהא ינג̇ס אלי אלמגיב
וג̇מיע מא תנצ̇ג̇ע עליה פי חיצ̇תהא ינג̇ס וג̇מיע מא תג̇לס עליה ינג̇ס
וכל מן דנא במצ̇ג̇עהא יגסל ת̇יאבה וירחץ̇ באלמא וינג̇ס אלי אלמגיב
וכל מן דנא בשי מן אלאניה אלתי תג̇לס עליה יגסל ת̇יאבה וירחץ̇ באלמא וינג̇ס אלי אלמגיב
ואן כאן עלי מצ̇ג̇עהא או עלי אלאנא אלד̇י הי ג̇אלסה עליה ממאסא לה פלינג̇ס אלי אלמגיב
ואן צ̇אג̇עהא רג̇ל פקד צאר חכם חיצ̇תהא עליה וינג̇ס סבעה איאם וכל מצ̇ג̇ע ינצ̇ג̇ע עליה ינג̇ס
ואיה מראה פאץ̇ דמהא איאמא כת̇ירה מן ג̇ר וקת חיצ̇תהא או בעקבה פג̇מיע איאם פיץ̇ נג̇אסתהא פלתכן פיהא כאיאם חיצ̇תהא נג̇סה
וג̇מיע אלמצ̇ג̇ע אלד̇י תנצ̇ג̇ע עליה טול איאם פיציהא פליכן להא כמצג̇ע חיצ̇תהא וג̇מיע אלאנא אלד̇י תג̇לס עליה פליכן נג̇סא כנג̇אסתה פי חיצ̇תהא
וכל מן דנא בשי מנהא פלינג̇ס באן יגסל ת̇יאבה וירחץ̇ באלמא וינג̇ס אלי אלמגיב
ואן הי טהרת מן פיצ̇תהא פלתחץ סבעה איאם ובעד ד̇לך תטהר
ופי אליום אלת̇אמן תאכ̇ד̇ שפנינין או פרכ̇י חמאם ותאת בהמא אלי אלאמאם אלי באב כ̇בא אלמחצ̇ר
ויעמל אלאמאם אחדהמא ד̇כוה ואלאכ̇ר צעידה ויסתגפר ענהא בין ידי אללה מן פיץ̇ נג̇אסתהא
פיג̇ב אן תג̇אנבא בני אסראיל מן נג̇אסתהם ולא יהלכון בנג̇אסתהם אד̇א הם נג̇סו מסכני אלד̇י הו בינהם
הד̇ה שריעה אלד̇איב ומן תכ̇רג̇ מנה נטפה אנסאל ללתנג̇ס בהא
ואלחאיץ̇ פי טמת̇הא ואלפאיץ̇ ד̇ובה מן ד̇כר ואנת̇י ורג̇ל יצ̇אג̇ע נג̇סה