ת̇ם כלם אללה מוסי והרון קאילא
אי אנסאן כאן פי ג̇לד בדנה שאמה או עארצ̇ה או בקעה או צאר פי בדנה בלא ברץ פליות בה אלי הרון אלאמאם או אלי אחד מן בניה אלאימה
פינט̇ר אלאמאם אלבלא פי ג̇לד אלבדן פאן כאן פיה שער קד אנקלב אביץ̇ ומנט̇ר אלבלא עמיק מן ג̇לד בדנה פהו בלא ברץ פאד̇א ראה כד̇אך פלינג̇סה
ואן כאנת בקעה ביצ̇א ליס מנט̇רהא עמיק מן אלג̇לד ושערהא לם ינקלב אביץ̇ פליוקפה סבעה איאם
ת̇ם ינט̇רה פי אליום אלסאבע פאן וקף אלבלא בעינה לם יתפש פי אלג̇לד פליוקפה סבעה איאם ת̇אניה
ת̇ם ינט̇רה פי אליום אלסאבע ת̇אניה פאן כבי אלבלא ולם יתפש פי אלג̇לד פליטהרה פאנהא עארצ̇ה ויגסל ת̇יאבה ויטהר
ואן תפשת אלעארצ̇ה פי ג̇לדה בעד מא אורי ללאמאם פטהרה פליורהא לה ת̇אניה
ואד̇א ראי אלאמאם קד תפשת פי ג̇לדה פלינג̇סה פאנהא ברץ
ואד̇א כאן באנסאן בלא ברץ פליות בה אלי אלאמאם
פנט̇ר אלאמאם פאד̇א בשאמה ביצ̇א פי ג̇לדה וקד אנקלבת אלשער אביץ̇ או ג̇זו מן לחם נקי פי אלשאמה
ברץ עתיק פי ג̇לד בדנה פלינג̇סה אלאמאם ולא יוקפה אד̇ הו נג̇ס
ואן אנתשר אלברץ פי אלבדן חתי גטא ג̇מיע בדן אלמבתלי מן ראסה אלי רג̇ליה ג̇מיע מנט̇ר עיני אלאמאם
פנט̇ר אלאמאם פאד̇א קד גטא אלברץ ג̇מיע בדנה פליטהרה אד̇ קד אנקלב כלה אביץ̇ פהו טאהר
ואי יום ט̇הר פיה לחם נקי פלינג̇ס פיה
באן ירי אלאמאם אללחם אלנקי פלינג̇סה לאן אלג̇זו מן אללחם אלנקי מע אלברץ נג̇ס הו
ואן רג̇ע אללחם אלנקי פאנקלב אביץ̇ פליג̇ אלי אלאמאם
פאד̇א נט̇ר אלאמאם אן אלבלא קד אנקלב אביץ̇ פליטהרה אנה טאהר
ואי אנסאן כאן פי ג̇לד בדנה קרח פברא
פצאר פי מוצ̇ע אלקרח שאמה ביצ̇א או בקעה ביצ̇א מחמרה פליור ללאמאם
פאד̇א ראי אלאמאם מנט̇רהא מתספלה מן אלג̇לד ושערהא קד אנקלב אביץ̇ פלינג̇סה פאנהא בלא ברץ אנתשר פי אלקרח
ואן הו נט̇רהא ולם יכן פיהא שער אביץ̇ וליס הי מתספלה מן אלג̇לד בל הי כאביה פליוקפה אלאמאם סבעה איאם
ואן הי תפשת פי אלג̇לד פלינג̇סה אלאמאם פאנהא בלא
ואן וקפת אלבקעה מכאנהא לם תתפש פהי מן את̇ר אלקרח פליטהרה אלאמאם
ואי אנסאן כאן פי ג̇לד בדנה כי נאר ת̇ם צאר ג̇ז אלכי בקעה ביצ̇א מחמרה או ביצ̇א פקט
פלינט̇רהא אלאמאם פאן אנקלב אלשער אביץ̇ וכאן מנט̇רהא עמיקא מן אלג̇לד פהו ברץ אנתשר פי אלכי פלינג̇סה אלאמאם
פאן ראהא אלאמאם וליס פיהא שער אביץ̇ וליסת הי מתספלה מן אלג̇לד בל הי כאביה פליוקפה אלאמאם סבעה איאם
ת̇ם ינט̇רה פי אליום אלסאבע פאן תפשת פי אלג̇לד פלינג̇סה אלאמאם פאנה בלא ברץ
ואן וקפת אלבקעה מכאנהא ולם תתפש פי אלג̇לד והי כאביה פהו מן את̇ר אלכי פליטהרה אלאמאם פאנהא תשויט אלכי
ואי רג̇ל או מראה כאן בה בלא פי ראסה או פי לחיתה
פלינט̇רה אלאמאם פאן כאן מנט̇רה עמיקא מן אלג̇לד ופיה שער דקיק אצהב פלינג̇סה אלאמאם פאנה כלף והוא ברץ אלראס או אללחיה
ואן ראה אלאמאם וליס מנט̇רה עמיקא מן אלג̇לד וליס פיה שער אסוד פליוקפה סבעה איאם
ת̇ם ינט̇רה פי אליום אלסאבע פאן הו לם יתפש ולם יכן פיה שער אצהב ומנט̇רה ליס עמיק מן אלג̇לד
פליחלק ג̇מיע שערה מא כ̇לא מוצ̇ע אלכלף פליוקפה סבעה איאם ת̇אניה
ת̇ם ינט̇רה אלאמאם פי אליום אלסאבע פאן הו לם יתפש פי אלג̇לד ומנט̇רה ליס עמיקא מן אלג̇לד פליטהרה ויגסל ת̇יאבה ויטהר
ואן תפשו אלכלף פי בדנה בעד טהרה
פנט̇רה אלאמאם וקד תפשי פי אלג̇לד פלא יפחץ ען אלשער אלאצהב בברהאן אנה נג̇ס
ואן וקף אלכלף פי עינה ונבת פיה שער אסוד פקד ברא אלכלף והו טאהר פליטהרה אלאמאם
ואי רג̇ל או מראה כאן פי ג̇לד בדנהם בקע בקע ביץ̇
פלינט̇ר אלאמאם פאד̇א כאן פי ג̇לד אבדאנהם בקע כאביה ביץ̇ פהו בהק אנתשר פי אלג̇לד והו טאהר
ואי אנסאן אנתתף שער ראסה פהו אצלע והו טאהר
ואן אנתתף ממא ילי וג̇הה פהו אג̇לח והוא טאהר
ואן כאן פי אלצלעה או אלג̇לחה בלא אביץ̇ מחמר פימכן אן יכון ברצא קד אנתשר פי צלעתה או פי ג̇לחתה
פלינט̇רהא אלאמאם אן כאנת שאמה אלבלא ביצ̇א מחמרה פי צלעתה או פי ג̇לחתה עלי סביל מנאט̇ר ברץ סאיר ג̇לד אלבדן ואחכאמהא
הו רג̇ל אברץ והו נג̇ס פלינג̇סה אלאמאם תנג̇יסא פאן בלאה פי ראסה
ואלאברץ אלד̇י בה אלבלא יג̇ב אן תכון ת̇יאבה ממזקה וראסה משעת̇א ועלי שארבה יתלת̇ם וינאדי אלנג̇ס אלנג̇ס
טול מא אקאם בה אלבלא ינג̇ס פאנה נג̇ס פליג̇לס פראדא כ̇ארג̇ אלעסכר יכון מסכנה
ואי ת̇וב כאן פיה בלא אלברץ מן ת̇וב צוף או כתאן
או סדא או לחמה מן כתאן או צוף או פי ג̇לד או פי מא צנע מנה
ויכון אלבלא אכ̇צ̇ר או אחמר פי אלת̇וב או פי אלג̇לד או אלסדא או אללחמה או פי שי מן אנא אלג̇לוד פד̇לך הו בלא אלברץ פליורא אלי אלאמאם
ת̇ם ינט̇רה אלאמאם ויוקפה סבעה איאם
ת̇ם ינט̇רה אלאמאם פי אליום אלסאבע פאן תפשי פי אלת̇וב או פי אלסדא או אללחמה או פי אלג̇לד וג̇מיע מא יעמל אלג̇לד ללצנאעה פד̇אך אלבלא ברץ מאחק והו נג̇ס
פליחרק אלת̇וב או אלסדא או אללחמה כאן מן צוף או כתאן או ג̇מיע אנא אלג̇לד אלד̇י יכון פיה אלבלא פאנה ברץ מאחק לד̇לך יחרק באלנאר
ואן ראה אלאמאם לם יתפש פי אלת̇וב או אלסדא או אללחמה או ג̇מיע אניה אלג̇לד
פליאמר אלאמאם בגסלה באלמא ויוקפה סבעה איאם ת̇אניה
ת̇ם ינט̇רה אלאמאם בעד מא גסל פאן כאן לם ינקלב לונה ולם יתפש פהו נג̇ס וליחרק באלנאר והי מהלכה כאנת פי סחקה או זבירתה
פאן ראה אלאמאם קד כבי אלבלא בעד מא גסל פליכ̇רקה מן אלת̇וב או מן אלג̇לד ויקטעה מן אלסדא או אללחמה
ואן ט̇הרת זיאדה פי אלת̇וב או אלסדא או אללחמה או ג̇מיע אנא אלג̇לוד פהי אלמנתשרה פלתחרק באלנאר אלת̇וב אלד̇י פיה אלבלא
ואלת̇וב או אלסדא או אללחמה או ג̇מיע אנא אלג̇לוד אן גסלת פזאל ענהא אלבלא פלתגסל ת̇אניה ותטהר
הד̇ה שריעה בלא אלברץ אלכ̇אץ פי ת̇וב אלצוף או אלכתאן או אלסדא או אללחמה או שי מן אנא אלג̇לוד ליטהר או לינג̇ס