ת̇ם אכ̇ד̇ אבנא הרון נדב ואביהוא כל רג̇ל מג̇מרתה וג̇עלא פיהמא נארא וצירא עליהמא בכ̇ורא וקרבא בין ידי אללה נארא גריבה מא לם יאמרהם בהא
וכ̇רג̇ת נאר מן ענד אללה פאכלתהמא ומאתא בין ידי אללה
פקאל מוסי להרון הו מא קאל אללה אני באלמקרבין אלי אתעט̇ם ובחצ̇רה ג̇מיע אלקום אתכרם פסכת הרון
ת̇ם דעא מוסי במישאל ואלצפן אבני עזיאל עם הרון פקאל להמא תקדמא אחמלא אכ̇ותכם מן בין ידי אלקדס אלי כ̇ארג̇ אלעסכר
פתקדמא וחמלאהמא בתואניהמא אלי כ̇ארג̇ אלעסכר כמא אמר מוסי
קאל מוסי להרון ולאלעזר ולאיתמר אבניה רווסכם לא תשעת̇ו ות̇יאבכם לא תמזקו ולא תהלכו ועלי ג̇מיע אלג̇מעה יכון סכ̇ט ואכ̇ותכם ג̇מיע בני אסראיל הם יבכון עלי אלחריק אלד̇י אחרקה אללה
ומן באב כ̇בא אלמחצ̇ר לא תכ̇רג̇ו לילא תהלכו לאן דהן מסח אללה עליכם פצנעו כמא קאל מוסי
ת̇ם כלם אללה הרון קאילא
כ̇מרא ומסכרא לא תשרב אנת ובנוך מעך פי דכ̇ולכם אלי כ̇בא אלמחצ̇ר ולא תהלכו רסם אלדהר עלי מר אג̇יאלכם
ולתפצלו בין אלקדס ואלבד̇ל ואלנג̇ס ואלטאהר
ולתפתו בני אסראיל בג̇מיע אלרסום אלד̇י אמרתכם עלי ידי מוסי
ת̇ם כלם מוסי להרון ולאלעזר ולאיתמר אבניה אלבאקיין כ̇ד̇ו אלהדיה אלפאצ̇לה מן קראבין אללה וכלוהא פטירא לזק אלמד̇בח לאנהא מן כ̇ואץ אלאקדאס
וג̇איז אן תאכלהא איצ̇א פי סאיר אלמואצ̇ע אלמקדסה אד̇ הי רזקך ורזק בניך מן קראבין אללה לאן כד̇א אמרת
ואמא קץ אלתחריך וסאק אלרפיעה פכלוהמא פי מוצ̇ע טאהר אנת ובנוך ובנאתך מעך פאנהא רזקך ורזק בניך קד אעטיתהמא מן ד̇באיח סלאמה בני אסראיל
כד̇אך סאק אלרפיעה וקץ אלתחריך מע אלשחום אלמחרקה יאתו בהא לתחרך תחריכא בין ידי אללה פתכון לך ולבניך מעך רסם אלדהר כמא אמר אללה
ועתוד אלד̇כוה אלתמסה מוסי פהוד̇א קד אחרק פסכ̇ט עלי אלעזר ואיתמר אבני הרון אלבאקיין קאילא
מא באלכם לם תאכלו אלד̇כוה פי מוצ̇ע מקדס לאנהא מן כ̇ואץ אלאקדאס ואללה אעטאכם איאהא לתחמלו וזר אלג̇מע ותסתגפרו ענהם בין ידי אללה
ואיצ̇א הוד̇א לם ידכ̇ל מן דמהא אלי אלקדס אלג̇ואני פקד כאן יג̇ב אן תאכלוהא פי אלקדס כמא אמרת לכם
פקאל הרון אלי מוסי הוד̇א אליום אלד̇י קרבו ד̇כותהם וצעידתהם בין ידי אללה וואפאני מת̇ל הד̇ה אלמצאיב פלו אכלת אלד̇כוה אליום הל כאן יחסן ד̇לך ענד אללה
פלמא סמע מוסי ד̇לך חסן ענדה