ואד̇ לא יכון ללאימה ואלליואניין אלד̇ין הם סאיר סבט לוי קסם ונחלה מע אלאסראיל פמן קראבין אללה ונחלתה יאכלון
ונחלה לא תכון לה פי מא בין אכ̇ותה אד̇ פראיץ̇ אללה הי נחלתה כמא אמר לה בהא
והד̇א יכון מעך רסם אלאימה מן אלקום מן ד̇אבחי אי ד̇בח כאן מן אלבקר ואלגנם אן יעטיהם אלד̇ראע ואללחיין ואלקבה
ואול ברך ועצירך ודהנך ואול ג̇ז גנמך תעטיה
לאן אללה רבך אכ̇תארה מן ג̇מיע אסבאטך ליקום ויכ̇דם באסם אללה הו ובנוה טול אלזמאן
ואד̇א חג̇ אי לוי מן בעץ מחאלך אלתי לג̇מיע אלאסראיל אלתי הו מקים בהא פלידכ̇ל אי וקת שא אלי אלמוצ̇ע אלד̇י יכ̇תארה אללה
ויכ̇דם באסם רבה כג̇מיע אלליואניין אלמקימין ת̇ם בין ידי אללה
וליתקסמו אנצבה מתסאיה מא כ̇לא מא את̇בתה אלאבא מן אלנואיב
ואעלם אנך דאכ̇ל אלי אלבלד אלד̇י אללה רבך מעטיך פלא תתעלם אן תעמל כמכארה אולאיך אלאמם
לא יוג̇ד פיכם מן ישעל אבנה או בנתה באלנאר וקאסם קסאמאת ומתפאל ומתטאייר וסאחר
וראקי רקאא וסאיל משעוד̇ או עראף ומלתמס מן אלמותי
לאן אללה רבך יכרה כל מן יצנע הד̇ה אלצנאיע ובג̇רירתהא הו קארצ̇הם מן בין ידיך
בל כן סאדג̇א ללה רבך
ואן האולי אלאמם אלד̇ין אנת וארת̇הם מן אלמתפאלין ואלקאסמין הם יקבלון ואנת לם יטלק לך אללה רבך מת̇ל ד̇לך
לכן אי נבי מן בינכם מן בעץ̇ אכ̇ותך מת̇לי ינצבה לך אללה רבך מנה פאקבלו
כג̇מיע מא סאלת אללה רבך פי ג̇בל חריב פי יום אלג̇וק וקלת לא אעוד אן אסמע צות אללה רב ולא ארי הד̇ה אלנאר אלעט̇ימה לילא אמות
פקאל אללה לי קד אחסנו פי מא סאלו
ואי נבי אנצבה להם מן בעץ̇ אכ̇ותהם מת̇לך אלקנה כלאמי פיכ̇אטבהם בג̇מיע מא אמרה בה
ואי אנסאן לם יקבל כלאמי אלד̇י יודיה עני פאני אטאלבה
ואי מתנבי תוקח פיקול קולא עני ממא לם אמרה אן יקולה ומן יתנבי במעבודאת אכ̇ר פליקתל ד̇לך אלמתנבי
פאן קלת פי נפסך כיף נערף אלקול אלד̇י לם יקלה אללה
פאנה מא יקולה אלמתנבי ען אללה ולא יג̇וז ד̇לך אלקול ולא יג̇ב פהו אלקול אלד̇י לם יקלה אללה ואנמא קאלה אלמתנבי בקחה פלא תחד̇רה