ואי אנסאן קרב קרבאן הדיה ללה וכאן קרבאנה סמידא פליצב עליה דהנא ויג̇על עליה לבאנא
ויאת בהא אלי בעץ̇ בני הרון אלאימה ויקבץ̇ מנהא מלו קבציתה מן סמידהא ומן דהנהא מע ג̇מיע לבאנהא ויקתר פוחהא ד̇לך עלי אלמד̇בח קרבאן מקבול מרצ̇י ללה
ואלפאצ̇ל מנהא להרון ובניה מן כ̇ואץ אלאקדאס מן קראבין אללה
ואן קרבת הדיה מן כ̇בז אלתנור פלתכן ג̇ראדק סמיד פטיר מלת̇ות̇ה בדהן ורקאק פטיר ממסוחה בדהן
ואן כאן קרבאנך הדיה עלי אלטאבק פלתכן פטירא מן סמיד מלת̇ות̇ בדהן
ואת̇רדהא ת̇רדה וצב עליהא דהנא בד̇לך תכון הדיה
ואן כאן קרבאנך הדיה מן צנעה אלטנג̇יר פלתעמל סמידא בדהן
פלתאת באלהדיה אלתי קד עמלת מן אחדי הד̇ה ללה ויקדמהא אלי אלאמאם יקדמהא אלי אלמד̇בח
וירפע מנהא פוחהא ויקתרה עלי אלמד̇בח קרבאן מקבול מרצ̇י ללה
ואלפאצ̇ל מנהא להרון ובניה מן כ̇ואץ אלאקדאס מן קראבין אללה
ג̇מיע אלהדאיא אלתי תקרבונהא ללה לא תעמל כ̇מירא לאן כל כ̇מיר וכל עסל לא תקרבו מנהמא קרבאנא מחרקא ללה
לכן קרבאנא אולא תקרבונהמא ללה ואלי אלמד̇בח לא יצעדא לקבול מרצ̇י
וג̇מיע קרבאן הדאיאך אמלחהא במלח ולא תעטל אלמלח פאנה עהד רבך מן הדיתך ומע סאיר קראבינך פקרב מלחא
ואן קרבת הדיה בכור ללה פפריכא מקלו באלנאר ג̇רישא מן אלהרף קרבהא
ואג̇על עליהא דהנא וציר עליהא לבאנא כד̇אך היא הדיה
ויקתר אלמאם פוחהא מן ג̇רישהא ודהנהא מע ג̇מיע לבאנהא קרבאנא ללה