הד̇ה אלכלמאת אלתי כלם בהא מוסי בני אסראיל פי עבר אלארדן פי בריה אלבידא מקאבל אלקלזם בין פארן ובין תופל ולבן וחצרת וד̇י אלד̇הב
עלי מסאפה אחד עשר יומא מן חרב עלי טריק ג̇בל שעיר אלי רקים ברנע
פלמא כאן פי אלסנה אלארבעין פי אליום אלאול מן אלשהר אלחאדי עשר כלם מוסי בני אסראיל בג̇מיע מא אמרה אללה אליהם
בעד פתחה בלד סיחון מלך אלאמוריין אלמקים פי חשבון ועוג מלך אלבת̇ניה אלמקים פי עשתרות פי אד̇רעאת
פי עבר אלארדן פי בלד מואב אמען מוסי פי ביאן הד̇ה אלתוריה קאילא
אללה רבנא קאל לנא פי חרב חסבכם אלמקאם פי הד̇א אלג̇בל
ולו וארחלו ואדכ̇לו אלי ג̇בל אלאמורי וג̇מיע ג̇יראנה פי אלגור ואלג̇בל ואלסהל ואלדארום וסאחל אלבחר בלד אלכנעאניין ואללבנאן אלי נהר אלכביר נהר אלפראת
ואנט̇רו קד ג̇עלת אלבלד בין ידיכם אצעדו וחוזוהא כמא קסם אללה לאבאיכם אברהים ואסחק ויעקוב אן יעטיהם ולנסלהם בעדהם
וקלת לכם פי ד̇לך אלוקת לא אסתטיע וחדי אן אחתמלכם
אד̇ אללה רבכם כת̇רכם פהוד̇אכם אליום ככואכב אלסמא כת̇רה
ואסל אללה אלאה אבאיכם אן יזיד פיכם מת̇לכם אלף מרה ויבארך פיכם כמא ועדכם
כיף אחתמל וחדי ת̇קלכם וקצצכם וכ̇צאמאתכם
האתו לכם ברג̇אל חכמא פהמא מערופין לאסבאטכם אצירהם ריסא עליכם
פאג̇בתמוני וקלתם מא אצלח אן יעמל הד̇א אלאמר אלד̇י קלתה
פאכ̇ד̇ת מן אסבאטכם רג̇אלא חכמא מערופין פג̇עלתהם ריסא עליכם ריסא אלוף וריסא מיין וריסא כ̇מסין וריסא עשראת וערפא עלי אסבאטכם
ואמרת חכאמכם פי ד̇לך אלוקת קאילא אסמעו פי מא בין אכ̇ותכם ואחכמו באלעדל בין כל רג̇ל ואכ̇יה וצ̇יפה
לא תחאבו אלוג̇וה פי אלחכם ואסמעו פי אלצגיר כאלכביר ולא תחד̇רו אחדא פאן אלחכם הו ללה ואי אמר צעב עליכם אדפעוה אלי חתי אנט̇ר פיה
ואוציתכם פי ד̇לך אלוקת בג̇מיע אלאמור אלתי יג̇ב אן תצנעוהא
ת̇ם רחלנא מן חרב וסרנא תלך אלבריה אלעט̇ימה אלמכ̇ופה אלתי ראיתמוהא עלי טריק ג̇בל אלאמוריין כמא אמרנא אללה רבנא חתי ג̇ינא אלי רקים ברנע
פקלת לכם קד ג̇יתם אלי ג̇בל אלאמורי אלדיי אללה רבנא מעטינאה
אנטיר קד ג̇על אללה רבך אלבלד בין ידיך אצעד פחזה כמא ועדך אללה אבאיך לא תכ̇ף ולא תרעד
ותקדם אלי כת̇יר מנכם פקלתם נבעת̇ ברג̇אל בין ידינא ירומו לנא אלבלד וירדון עלינא ג̇ואבא ען אלטריק אלד̇י נצעד פיה ואלקרי אלתי נדכ̇ל אליהא
פחסן ד̇לך ענדי פאכ̇ד̇ת מנכם את̇ני עשר רג̇לא רג̇לא ואחדא מן כל סבט
פולו וצעדו אלי אלג̇בל וג̇או אלי ואדי אלענקוד וראמוה
ואכ̇ד̇ו מעהם מן ת̇מר אלארץ̇ ואחדרוה אלינא ורדו עלינא ג̇ואבא וקאלו אן אלבלד אלד̇י אללה רבנא מעטינאה לג̇יד
פלם תשאו אלצעוד אליה וכ̇אלפתם אמר אללה רבכם
ותכ̇רסתם פי אכ̇ביתכם וקלתם מן שנאה אללה לנא אכ̇רג̇נא מן בלד מצר ליסלמנא פי יד אלאמוריין פינפד̇ונא
אלי אין נחן צאעדון ואכ̇ותנא אמאסו קלובנא בקולהם אן אלקום אכת̇ר וארפע מנא ואן קראהם כבאר וחצינה תדאני אלסמא חתי בני אלג̇באברה ראינאהם ת̇ם
פקלת לכם לא תראהבוהם ולא תכ̇אפוהם
אללה רבכם אלסאיר נורה בין ידיכם הוא יחארב ענכם כג̇מיע מא צנע במצר בחצ̇רתכם
וכמא ראית פי אלבר אן אללה רבך חמלך כמא יחמל אלמר ולדה אשפאקא פי כל טריק סרתם פיהא אלי אן ג̇יתם אלי הד̇א אלמוצ̇ע
ופי הד̇א אלאמר אפלא תומנון באללה רבכם
אלסאיר נורה אמאמכם פי אלטריק ליצלח לכם מכאנא לנזולכם ובאלנאר לילה ליצ̇יכם אלטריק אלד̇י תסלכונה ובאל גמאם נהארא
פסמע אללה כלאמכם פסכ̇ט וקסם קאילא
אן ראי רג̇ל מן האולי אלנאס הד̇א אלג̇יל אלרדי אלבלד אלד̇י אקסמת באעטאיה לאבאיכם
סוי כלב בן יפנה פאנה יראה ולה אעטי אלבלד אלד̇י סלכה ולבניה למא אתבע טאעה אללה
איצ̇א עלי וג̇ד אללה בסבב מא חדת̇ אד̇ תאכ̇רתם קאילא איצ̇א אנת לא תדכ̇לה
יהושע אבן נון אלקאים בין ידיך הו ידכ̇לה פשדדה פאנה יורת̇ה לבני אסראיל
ואטפאלכם אלד̇ין קלתם אנהם יכונון גנימה ובנוכם אלד̇ין הם אליום לא יערפון כ̇ירא ושרא הם ידכ̇לונה ולהם אעטיה פיחוזונה
ואמא אנתם פולו וארחלו פי אלבר אלי טריק בחר אלקלזם
פאג̇בתמוני וקלתם קד אכ̇טאנא ללה ונחן נצעד פנחארב כמא אמרנא אללה רבנא פתקלד כל ואחד מנכם אלאת חרבה ובאדרתם לתצעדו אלי אלג̇בל
פקאל אללה לי לא תצעדו ולא תחארבוהם פאני ליס נורי מעכם לילא תנסדמו בין ידי אעדאיכם
פקלת לכם ד̇לך ולא קבלתם בל כ̇אלפתם אללה ותוקחתם עלי צעוד אלי אלג̇בל
פכ̇רג̇ אלאמוריין אלמקימון פי ד̇לך אלג̇בל תלקאכם פכלבוכם כמא ילסע אלנחל וחטמוכם פי שעיר אלי חרמה
פרג̇עתם באכין בין ידי אללה פלם יסמע צותכם ולא אג̇אבכם
פאקמתם פי רקים מדה טוילה שביהה בסאיר מא אקמתם